‫الرئيسية‬ Non classé سرعة الضّو الزجال إبراهيم ازنيدر
Non classé - 11 أكتوبر 2019

سرعة الضّو الزجال إبراهيم ازنيدر

سرعة الضّو

شحال
إيلا جمعنا
ماخلفَتُه فينا السنين

إيلا قلنا
سنين وحنا غاديين

شحال
بقياس الضّوْ؟

تيه الخلفَه

فرَاغ الفكرة

مَوْت الذّ كرى

والبالْ

ميّالْ لسُرعَةْ الضّو…

واش الحظْ
فراغْ
يبلع ف جوفُه
ما جاه

واش الغد
ثُقبْ أسوَدْ
يهضَمْ مَا قدّامُه
وَوراه

يذكّرنِي القمر

بسقوط التّاريخ
ورقات
يبلعْهَا النّسيان

كان ليّا قمر

ف خلوتي
مخاويني

كان ليّا قمر

إيلا نسيت
يغسل عينيْ

يبات
على باب القلب

أنا ليّا رب

أنا ليّا رب
نسافر معه

تسبقنا غيمه
خبّات
ف رحمها
مفتاح الأسطورة

حكايَه محنطة
هناك
ف الشّط
تغسَلْها الاَموَاجْ

تخميمة ف الغيم
هنَا
عل الصخَرْ مكتوبَه

يذكّرني القمر
قبل نزولنا للأرض

باللي الشيطان
كان مَلَكْ
ماكانش عَبدْ

يذكّرني القَمرْ
قبل من السنّه والفرض

باللّي كان
رسولْ الرّفض

كان
ينزل من بُرجُه

وهناك ف الصّحرا
نفرش له
قصيدة

كان يهدينِي
لَطرِيقْ
ف الصّحرا

نزرعْ فيها شَجْرَه
من مُقْ عينيه

بالليل تضوّي
ترشد التّايهين

بنهار
تظلّل
مسافَرْ
ف البحت على
مفتاح الأسطورَه

لبَسْ القمرْ وجهْ العادَه

أُو فَ الزمانْ الفانِي هذا
تعلّم الشّاعِرْ شوفَةْ الخلودْ

رسَم بوسَه
على خَدْ الَورودْ

رسَمْ الكونْ
حادْ مَا محدودْ

وقتاشْ حشَرْ الظلام
نيفُه ف النهارْ
وشنَق عَزفْ الكيتَارْ

وقتاشْ النهار
سرحَتُه الظلمه
خرجْ على النّاس
بخمارْ

وقتاش سكر الما
بدّل طريقُه
غطَسِ ف زلّتنا
تقيا الَمرارْ

كان علينا نسالوا
كيف تعثرتْ الجغمَه ف الحَلقْ

كان عينا نسالوا
علاش الغمزَه تحرَقْ

كان علينا
نفهموا بغمزَه
باللي حنا عبيد
وخدودْ الورودْ
تادّي للشّنقْ

كان علينا نفهموا
باللي العشقْ حرامْ
الرّسم حرامْ
الشّعرْ حرامْ
الموسيقى حرامْ
والشّوفَه ف القمَرْ
حرام ف حرامْ

كان علينا نقرصوا وذنينا
نعرفوا باللي مقيينا الطينْ
يتسنّى رجوعنا لجوفُه
وحنا مسَلْمِينْ

فَ طرِيقْ الَمدادْ
رسَمتْ ريشَه
وعُشْ حمامْ

لقيتْ وطني
فرّخْ ظلام
فرّخني ف خَلوَه
خارَجْ لايَامْ
ميّالْ
لسرعَةْ الضّو

ابراهيم ازنيدر
صباح 21فبراير2016

ولفت
نسيح مداد
ف كتبة
نقراني حراق ونمحيني..
ولفت
نعلقني على باب المدينة
شي يشوفني حرفة ودربة
شي يقول ضربة شمس
أدت للمس
الموت بالزربة…
نشوفني غربة بقراب
نسقي الفرح
نشوفني ساحر ف سيرك
يطلع من الجرح
ألوانات
بالونات
حروف تعرش سلالم
نصعد بهلوان
نفرش للشمس كلام
تسولف به
تعجنه ف دورتها
تزرعو ف قلوب الناس
محبة وسلام..
ولفت
نمحيني ف سبيلها
يهدا الحريق..
ولفت نغبر ف الفراغ
نتساغ ثقب
كيف اللي ف السما
نبلع شقاوتي
نسرط شقايا
نتبخر
مانشيط ورايا…!
ولفت
نختارني دهشة
بكلام وازن
نطير
نرسم ريشة
نحط لوحات قدامي
نعوم ف بحر الألوان…
ولفت
ولفت…الحكاية هربت مني
ماولفت فات
من طريقي فات
مات فيا الولف
بقيت فرادي ف غربتي
نقتل الروتين والولف…

الزجال إبراهيم ازنيدر

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

‫شاهد أيضًا‬

تأسيس فرع جديد لجمعية التنمية الطفولة والشباب

تم اليوم عقد الجمع العام التأسيسي لفرع بني وليد لجمعية التنمية الطفولة والشباب بقاعة العرو…